Cancer di matriz

Cancer di matriz

E siguiente informacion ta trata tocante kico cancer di matriz ta encera, kico ta e sintomanan, e factornan di riesgo, y kico bo mes por haci pa yuda preveni e malesa aki.

tout-savoir-sur-le-cancer-du-col-de-l-uterus

E organonan genital di hende muhe

E organonan genital (e organonan di reproduccion) di hende muhe ta consisti di organonan interno y externo:

  • E organonan genital externo ta inclui e schaamlippen chikito y grandi, e clitoris, y e entrada di e vagina.
  • E organonan genital interno ta inclui e matriz, e vagina, e ovarionan y e oviductonan (‘eileiders’).

rep-organ

E matriz

E matriz tin e forma y tamaño di un peer boca abou. E parti hancho, cu ta e parti mas grandi di e matriz, ta wordo yama e curpa di matriz. Na cada banda di esaki bo ta haya e dos ovarionan y e oviductonan (‘eileiders’). E oviductonan ta forma e conexion entre e ovarionan y e matriz. E parti mas abou di e matriz, cu ta e parti mas smal, ta wordo yama boca di matriz. E boca di matriz ta forma e conexion entre e curpa di matriz y e vagina.

E tehido cu ta forma e muraya di e curpa di matriz ta consisti di dos capa:

  • un capa di slijmvlies banda paden
  • un capa di musculo banda pafo

E produccion di hormona

Hormona ta un tipo di substancia cu nos curpa ta produci. Hormonanan ta wordo transporta den nos sanger y nan tin influencia riba cierto procesonan y organonan den nos curpa.

E ovarionan ta produci e hormonanan femenino. E hormonanan aki ta hunga un rol den diferente proceso den e curpa di hende muhe, por ehempel menstruacion y fertilidad.

Menstruacion

Tin dos sorto di hormona cu ta influencia menstruacion:

  • hormona estrogeno
  • hormona progestativa

Cambionan den e nivel di e hormonanan aki ta haci cu tur luna e slijmvlies den e matriz ta prepara pa un ovulo (‘eicel’) fertilisa. Ora e ovulo no wordo fertilisa y pues no tin un embaraso, e slijmvlies ta sali cu poco sanger for di e matriz via e vagina. Esaki ta wordo yama menstruacion. E cambionan hormonal aki di tur luna ta cuminsa durante pubertad y ta dura te cu mas of menos e edad di cincuenta aña. Despues di esaki menopausa ta cuminsa.

cancer ute

Cancer di matriz

Den mayoria caso di cancer di matriz esaki ta wordo desaroya den e capa di slijmvlies banda paden di e matriz. Cancer di matriz ta surgi ora celnan den e matriz cu tin daño cuminsa dividi di manera incontrolabel y asina forma un tumor. E tumor aki eventualmente por crece te na e capa di musculo banda pafo di e matriz, e boca di matriz of e ovarionan. Cu tempo e tumor por expande y yega na tehido y organonan cu ta cerca di e area aki.

Ora un tumor crece tin mas chens cu e celnan di cancer ta plama den e curpa via sanger of likido limfatico. Den caso di cancer di matriz esaki ta plama mas tanto via likido limfatico. E celnan canceroso ta yega prome na e kliernan limfatico den barica. Cancer di matriz por plama via sanger tambe, pero esaki mas tanto ta pasa den un etapa mas avansa di e malesa.

Cancer di matriz, manera hopi otro tipo di cancer, no ta contagioso. E no por wordo contagia via relacion sexual tampoco.

Cancer di boca di matriz no ta mesun cos cu cancer di matriz. Nan ta diferente sorto di cancer y nan ta rekeri tratamento diferente. Cancer di boca di matriz ta surgi na e conexion entre e matriz y e vagina. E virus HPV (humaan papilloma) hopi biaha ta hunga un rol den e desaroyo di cancer di boca di matriz. Den e desaroyo di cancer di matriz e virus aki no ta hunga un rol.

Sintomanan di cancer di matriz

E sintomanan di cancer di matriz mas comun ta:

  • Perdida di sanger via vagina despues di menopausa.
  • Perdida di sanger via vagina entre menstruacion of trastorno di menstruacion (cerca hende muhe prome cu menopausa).
  • Dolor den parti abou di barica (hopi biaha esaki ta tuma lugar den un etapa mas laat)

Si bo tin perdida inusual di sanger via vagina, of secrecion vaginal inusual, ta consehabel semper pa acudi na bo dokter di cas. Por tin otro causanan tambe di e perdida di sanger of secrecion vaginal cu no ta cancer di matriz.

Mescos hopi otro tipo di cancer, mas trempan cancer di matriz wordo detecta, mas mihor e chensnan di recuperacion ta.

Causanan di cancer di matriz

Tin diferente factor cu por hisa e riesgo di haya cancer di matriz:

  • Edad: cancer di matriz ta un malesa cu mas tanto hende muhe riba 60 aña di edad ta haya. E no ta un malesa comun cerca hende muhe bou di 40 aña di edad. E riesgo di haya cancer di matriz ta subi cu edad.
  • Terapia cu hormona estrogeno so: hormona estrogeno sa wordo prescribi ora tin kehonan relaciona cu menopausa. Esaki por hisa e riesgo di haya cancer di matriz. Pa reduci e riesgo aki hormonanan estrogeno ta wordo prescribi den combinacion cu un ‘progestativum’.
  • Uzo di e remedi Tamoxifen: e remedi aki ta wordo uza den tratamento di cancer di pecho.
  • Factornan genetico: ora cu tin diferente persona den famia cu cancer di matriz.
  • Otro malesanan: por ehempel diabetes.
  • Menstruacion trempan y/of menopausa laat: mas hopi ciclo di menstruacion un hende muhe pasa aden, mas hopi e ta wordo exponi na nivelnan halto di hormona estrogeno.
  • Hende muhe cu no haya yiu, of cu haya poco yiu: hende muhe cu no haya yiu of poco yiu tin un riesgo mas halto.

Tambe tin factornan den nos estilo di bida cu por hisa e riesgo di haya cancer di matriz:

  • Peso di mas of obesitas.
  • Demasiado vet na cintura.
  • Poco actividad fisico.
  • Un patrono di alimentacion cu hopi alimento cu ta contene hopi sucu y cu ta hopi procesa. Por ehempel buscuchi y mangel, producto di grano refina (manera pan blanco) y refresco.

Ta conoci tambe cu bebemento di pilder anticonceptivo por reduci e riesgo di haya cancer di matriz.

Tene cuenta cu si algun di e factornan aki ta aplica na bo persona, esaki no necesariamente kiermen cu bo lo haya cancer di matriz. Bo tin un riesgo mas halto si, pero tin hopi accion cu bo por tuma pa reduci e riesgo aki.

 

Prevencion di cancer di matriz

Estudionan cientifico ta mustra cu alimentacion saludabel, actividad fisico y un peso saludabel ta importante pa preveni cancer di matriz. Cientificonan ta calcula cu mas of menos 40 porciento di e casonan di cancer di matriz na paisnan occidental por wordo preveni door di un estilo di bida saludabel.

 

Tuma accion pa reduci bo riesgo di haya cancer di matriz:

  • Percura pa un peso saludabel: Peso di mas y obesitas ta hisa e riesgo di haya cancer di matriz. Vet na cintura tambe ta hisa e riesgo aki. E vet aki ta stimula bo curpa pa produci mas di cierto hormonanan. Un concentracion halto di e hormonanan aki tin un relacion cu cancer di matriz y otro tiponan di cancer. Percura pa un peso saludabel door di come saludabel y move mas.

 

  • Move mas: Tur sorto di actividad fisico ta reduci e riesgo di haya diferente tipo di cancer. Actividad fisico ta yuda nos kima caloria y di e manera aki e ta yuda nos mantene un peso saludabel. Ademas di esaki actividad fisico ta yuda nos mantene un nivel di hormona saludabel, y di e manera aki e ta yuda proteha contra cancer di matriz. Move por lo menos 30 minuut tur dia.

 

  • Come saludabel: Cientificonan a descubri cu un patrono di alimentacion cu un peso glucemico (‘glycemische last’) halto por hisa e riesgo di haya cancer di matriz. Alimentonan cu un peso glucemico halto ta alimentonan cu ta hisa e nivel di sucu den nos sanger di forma lihe. Un paar di ehempel ta buscuchi, mangel, pan blanco y refresco. Fruta, berdura, legumbre (manera boonchi) y productonan di grano integral tin un peso glucemico mas abou. Limita cuminda y bebida cu hopi sucu y caloria. Scohe pa fruta, berdura, legumbre y productonan di grano integral. Esaki ta yudabo mantene un peso saludabel tambe.

 

Resultadonan di estudionan cientifico recien ta indica cu bebemento di koffie por reduci e riesgo di haya cancer di matriz. Pero ainda no ta cla ta cuanto koffie, y ki frecuencia di bebemento di koffie, ta yuda proteha. Tambe falta mas estudio y sondeo pa saca afo si koffie tin relacion cu otro tipo di cancer of otro malesanan. Pues ainda falta mas investigacion pa asina cientificonan compronde e relacion entre koffie y cancer mas mihor prome cu un recomendacion por wordo forma. Pa mas informacin por acudi na Koningin Wilhelmina Fonds Aruba of bai na nos website Koninginwilhelinafonds.com. Tambe por tuma contacto via nos FaceBook Koningin Wilhelmina Fonds Aruba of bel na 5820412 pa papia cu un hende personalmente.

Posted in: Uncategorized