Cancer di Prostat

prostate

Kico e klier di prostat ta haci?
Prostat – grandura di un walnoot – ta produci e likido cu ta preserva y ta transporta sperma warda den e testiculonan.

Mi por sobrebibi sin mi prostat ?
Si. Los di su funcion specialisa, e no tin ningun otro efecto riba bo curpa.

Kico ta cancer di prostat?
Cancer di prostat ta un enfermedad caminda ta haya cel maligno den e tehido di prostat. Prostat ta traha likido pa semen. Cancer di prostat ta mas comun cerca hende homber cu ta riba 50 aña. E ta e di dos causa di morto di cancer mas comun serca hende homber.

Kico ta causa cancer di prostat?
E expertonan no sa kico precies ta e causa. Sinembargo, nan ta kere cu e factornan, manera edad y historia di famia, por aumenta e risico pa desaroya e enfermedad.

Con mi por haya sa, si mi tin cancer di prostat?
Den e fase inicial usualmente hende no ta mira e sintomanan. Sinembargo, nan ta aparece ora e cancer ta hopi leu caba. Mayoria di hende homber no sa cu nan tin cancer di prostat te ora nan descrubie durante un test di rutina of un screening test.

Con ta diagnostica e cancer aki?
Un biopsia di e tehido di e prostat ta necesario pa diagnostica e cancer definitivamente. Resultado di un saminacion digital rectal (DRE) y un test di sanger , prostate specific antigen (PSA) por confirma un cancer di prostat.

Con ta clasifica cancer di prostat?
Cancer di prostat ta clasifica segun su grado y fase. E grado ta describi con e aparencia y e actuacion di e celnan canceroso ta den comparacion cu e celnan normal di prostat. Mas halto e grado ta, mas sigur e celnan lo multiplica mas rapido y plama pa otro parti di curpa. E fase ta describi con leu e cancer a plama.

Con lo trata mi cancer di prostat?
Tin diferente opcion di tratamento: warda y controla , via medicamento, terapia di radiacion y operacion. E tratamento ta depende di: e fase di e cancer , e grado di e cancer , e edad y salud en general y cua tratamento e pashent ta prefera.

Ken ta afecta pa cancer di prostat?
Cancer di prostat ta aumenta cu edad, particularmente despues di 50 aña. Autopsia haci cu hende homber cu a muri cu 70 y 80 aña di otro tipo di malesa, a descrubi cu mayoria di nan tabatin tumor chikito den nan prostat. Entre 60% y 70% di hende homber mas bieu cu 80 aña cu cancer di prostat no tabatin niun sintoma.

Kico ta aumenta risico pa haya cancer di prostat?
E factornan di risico ta inclui:

1. Edad riba 65. Mas of menos 75% di hende homber diagnostica cu cancer di prostat ta riba 65 aña.

2.Historia di famia: Si bo tata of ruman homber a haya cancer di prostat tempo cu un di nan tabata mas hoben cu 65, e pashent su risico ta aumenta. Si bo ta 40 aña y tin historia di cancer di prostat den bo famia, acudi na un doctor pa mas informacion.

3.Origen etnico. E chens di hende homber di colo, ta mas halto cu homber di otro antecedente etnico.

4.Dieta cu hopi vet y trabou relaciona cu cadmium.

Ken por trata mi cancer di prostat?
Un urologo of un oncologo di radiacion por trata cancer di prostat. Tin hende por consulta tur dos specialista.

Con e tratamento pa cancer di prostat lo afecta mi?
Esaki ta depende di e tratamento cu bo a scohe. Terapia hopi biaha ta afecta e funcionamento sexual.

Impotencia ta un consecuencia fastioso cu hende homber tin cu spera. Esaki por ta temporario, tratabel of permanente. Tin hende homber por pasa door di diferente grado di incontinencia (lekmento di orina).

Splicacion cu bo mester sa:
1. Biopsia
Kitamento di un muestra di tehido pa haci saminacion microscopico p’asina por diagnostica y evalua presencia di cancer.
2. Estado clinico
Evaluacion di grandura y gordo di e tumor, particularmente si e ta limita den e prostat so. Tambe ta inclui evaluacion di klier limfatico serca di e prostat y si e cancer a plama pa otro parti di e curpa. (sistema T.N.M. “Tumor, Klier, Metastasis.”)
3. DRE
Saminacion digital rectal: un dokter cu su dede den e rectum ta fula si tin tumor di prostat.
4. Gleason grade
Un sistema cu e patologo ta uza pa samina e muestra di prostat (biopsia). E patologo ta check e patronchi di e celnan canceroso pa evalua e grado y nivel di agresividad di e cancer y ta dun’e un score di 1 te 10. Score di 4-6 ta considera gradi abou (menos agresivo); 7 grado intermedio (agresividad modera) y 8-10 grado halto (masha agresivo)
5. Maligno
Ta describi un tumor canceroso; un tumor benigno no ta canceroso.
6. Metastasis
E grado di expansion di cal canceroso for di un tumor den cercania of den e partinan leu di e curpa.
7. PSA
Prostate-specific antigen, un tipo di proteina produci solamente door di e celnan di prostat; midi door di un test di sanger ta uz’e pa sigui crecemento di e tumor, pa midi e efectonan di tratamento y indica si e malesa a bolbe lanta cabes.

Posted in: Uncategorized