Con pa splica un mucha cu bo tin cancer

Con pa splica un mucha cu bo tin cancer

 

Ta hopi dificil ora un hende keda diagnostica cu cancer. Hopi bes banda di esaki, ainda mayornan mester pensa ta con nan ta bai bisa nan yiunan cu nan of un otro ser keri tin cancer. Nan tin miedo di e forma con e muchanan lo reacciona. Con hoben cu un mucha ta, un cos ta sigur y esey ta cu e por sinti cu algo no ta bon. Si bo no informanan kiko ta pasando, nan por asta bai imagina cosnan mas pio di loke e situacion ta. No ta facil, pero ta esencial pa splica un mucha kiko ta pasando cu su ser keri.

Den un serie di articulo Koningin Wilhelmina Fonds Aruba lo duna splicacion riba kiko pa haci den situacionnan specifico. E siman aki nos lo enfoca riba con pa papia cu un mucha riba e diagnostico di dokter. Bon comunicacion cu e mucha ta esencial pa asina yuda e famia deal cu e situacion mihor.
Ta hopi importante pa papia habri cu e mucha desde un comienso. Asina cu e adulto ricibi e diagnose di dokter e por cuminsa splica e mucha den un forma cu ta apto pa su edad. Ora bo comparti informacion cu e mucha desde tempran, esaki lo haci e experiencia aki menos spantoso p’e. Esaki no kiermeen cu papia di cancer ta facil. Sigientemente algun tips na momento cu bo tin cu papia cu un mucha over di cancer:
1. Prepara di antemano kiko bo kier bai bisa
Hopi mayor ta haya mas facil pa papia cu e mucha si nan a prepara esaki di antemano of a scirbi tur loke nan kier bisa. Tin mayornan ta haya mas facil si nan pareha of un otro persona di confiansa ta hunto cu nan. Tambe ta mihor si e momento cu bo escohe pa papia cu e mucha ta uno trankilo y cu tur hende ta calmo. Si bo tin yiunan di diferente edad, ta mihor pa papia cu esnan mas biew prome. Kisas asta nan lo kier yuda na momento cu bo mester bai papia cu esnan mas chikito. Trata di tene e conversacionnan aki no mucho apart di otro ya asina tur hende ta na altura di e situacion y por sostene otro.
2. Determina e tono den cual bo ta bai hiba e combersacion
Mesun importante cu e contenido di e combersacion, ta e tono den cual bo ta hiba e combersacion. Uza un tono di voz calmo y sigur. Asta si bo gemoed yena y bo bira tristo, esaki lo yuda e mucha mira cu bo ta purbando di deal cu e situacion. Si bo yiunan bira overstuur y nan kier bai, bisanan cu bo ta compronde cu e combersacion aki no ta uno facil y cu e ta dificil pa nan tambe. No papia mas largo cu nan ta dispuesto pa scucha. Corda cu mucha chikito tin un attention span mas cortico.
3. Considera e edad di bo yiu
Corda cu cada edad ta compronde cosnan na un forma diferente. Ora bo papia cu e mucha, percura pa esaki ta na un nivel cu e por compronde. Uzando un vocabulario comprendibel y cu e mucha ta custuma cune, ta haci cu e lo compronde e situacion mihor. Usa palabranan simpel y terminonan concreto. Ta hopi importante pa bo splica e mucha cu cancer no ta contagioso. Muchanan chikito hopi biaha ta pensa cu ora bo ta malo ta trata di algo cu ta pega. Splicanan cu nan por brasa y sunchi nan ser keri sin ningun problema.
Si e mucha tin pregunta, prepara pa contesta nan preguntanan y splicanan kiko cancer ta, ki tipo di cancer bo tin y unda bo tin e. Splica mihor cu bo por y no splica e cosnan mas dificil di loke ta necesario. Si bo no sa un contesta, bisa e mucha cu bo lo contest’e despues.
4. Pidi asistencia profesional
Si bo mester di guia profesional prome cu bo papia cu bo sernan keri, no duda na tuma contacto cu un instancia profesional. Bo por papia cu bo specialista of un otro persona di confiansa. Bo por aserca Koningin Wilhelmina Fonds Aruba tambe pa guia y asistencia. Nos tin gruponan di sosten unda cu bo por papia cu otro hendenan cu a pasa den experiencianan similar y asina boso por comparti experiencia y yuda otro. Tambe nos tin foyetonan cu informacion riba diferente topico cu por yudabo den e momentonan cu mester di dje. Bo por pasa na nos Centro di Informacion na Spinozastraat 9 of tuma contacto cu nos via nos Facebook page Koningin Wilhelima Fonds Aruba. Tambe por yama na 5820412.
E tratamento

Ta hopi dificil ora un hende keda diagnostica cu cancer. Hopi bes banda di esaki, ainda mayornan mester pensa ta con nan ta bai bisa nan yiunan cu nan of un otro ser keri tin cancer. Nan tin miedo di e forma con e muchanan lo reacciona. Con hoben cu un mucha ta, un cos ta sigur y esey ta cu e por sinti cu algo no ta bon. Si bo no informanan kiko ta pasando, nan por asta bai imagina cosnan mas pio di loke e situacion berdadero ta. No ta facil, pero ta esencial pa splica un mucha kiko ta pasando cu su ser keri. Den un serie di articulo Koningin Wilhelmina Fonds Aruba lo duna splicacion riba kiko pa haci den situacionnan specifico. Den nos prome articulo nos a enfoca riba con pa participa e noticia na un mucha. E siman aki nos lo enfoca riba con pa papia cu un mucha riba tratamento di cancer. Bon comunicacion cu e mucha ta esencial pa asina yuda e famia deal cu e situacion mihor.


Ta hopi importante pa papia habri cu e mucha desde un comienso. Ki ora cu bo tuma e desicion pa papia cu e mucha over di e tratamento, sea ta na comienso of durante di e tratamento, importante ta pa tene e mucha informa. Tratamento di cancer lo trece hopi cambio den e bida diario di e famia. Ta bon pa encurasha e mucha(nan) pa haci pregunta si nan ta preocupa of ta confundi. Sigientemente algun tips na momento cu bai papia cu e mucha over di e tratamento di cancer:

Informa e muchanan di e cambionan cu lo bin den nan rutina diario
Ora ta papia di tratamento di nan mayornan, hopi bes e muchanan kier sa kiko esaki lo nifica pa nan. Si mami ta na hospital, ken ta hibanan scol, ken ta cushina pa nan, ken ta hibanan nan actividadnan despues di scol. Laga bo yiu(nan) sa cu e preocupacionnan aki ta importante pa bo tambe. Si ainda bo no tin bo support team (famia, bisiñanan y amistadnan) para banda dibo, sigura bo yiu cu asina e plan ta cla lo bo informanan ken ta yudanan y cuidanan mientras cu bo ta malo y bou tratamento.
 
Prepara e muchanan pa posibel side effects di e tratamento
Ora bo papia cu bo yiu(nan) di e tratamento, prepara nan pa posibel efectonan secundario di e tratamento. Ta dificil pa muchanan acepta e cambionan cu por bin den nan mayornan manera por ehempel caida di cabey, perdida di peso, sacamento, mareo. Si e muchanan sa di antemano kiko lo por sosode y cu e efectonan secundario ta parti di e tratamento y no di e malesa, nan lo por deal mihor cu e situacion.
Cu muchanan entre 5 y 8 aña di edad por splicanan por medio di pinturanan kiko ta algun di e cambionan cu nan lo por bai wak. Esaki ta un forma concreto pa splicanan algo cu kisas nan lo no compronde den prome instante. Hopi biaha no ta necesario pa splica den mucho detaye. Kisas por bisa e mucha(nan) cu ‘Papi mester tuma un remedi hopi fuerte cu lo lage sintie malo pero cu esaki ta door di e remedi’. Tambe por bisanan cu ‘Mami ta bai ta hopi cansa y p’esey e mester sosega hopi y lo no por hunga mesun hopi cune manera cu e ta desea’.
Como cu tur hende ta reacciona diferente riba e tratamento, por splica e mucha(nan) cu no ta tur ora e efectonan lo ta asina pero cu si nan sosode un otro ser keri lo cuidanan mientras e mayor ta recupera. Dunando e mucha(nan) e informacion y sosten aki, ta mustranan cu apesar di tur cos bo ta stimanan.
Yuda e muchanan keda den contacto cubo durante e tratamento
Un forma pa yuda e mucha durante e tratamento ta pa lage sintie serca dibo. Por ehempel, si bo tin cu bai hospital, laga e mucha(nan) pinta dibuhonan cu por colga na muraya of laganan manda caarchi pabo. Si bo por, bo tambe por pinta of manda caarchi pa nan na cas. Lagando e mucha(nan) sa con hopi bo ta stimanan, ta laga nan deal mihor cu e situacion.
Tin biaha e tratamento ta pone cu e mayor no por haci cierto cosnan mas manera carga e yiu(nan) of hunga cu nan. E mucha(nan) por haya falta di e cariño aki y p’esey por laga e mucha(nan) sinta serca dibo ya bo por brasa nan y papia cu nan facilmente. Papia cu e mcuha(nan) riba con nan dia a bai y con ta na scol tambe ta un forma pa keda uni. Tin biaha e mucha(nan) kier haci algo bek pa e mayor y ta bon pa duna nan cierto tareanan cu ta laganan sinti responsabel y cu nan a duna nan aporte. Aki ta papia por ehempel di laga nan trece un glas di awa pa e mayor of un deken. Serca muchanan mas grandi por pidi nan yuda den e trabounan di cas manera laba tayo of pasa un basora.

Laga bo yiu(nan) sa cu bo ta aprecia loke nan ta haci pero cu nan por sigui cu nan acividadnan normal manera bai scol y traha huiswerk of bai hunga serca nan amigonan. Importante ta pa e mucha(nan) sa cu ni cuanto dificultad bida trece, e amor di nan mayornan ta incondicional y nunca lo cambia.

Steve, Ellie, Finn, and Greta Schoenberger
Koningin Wilhelmina Fonds Aruba t’ey pa guia y duna asistencia na pashentnan di cancer y nan famia. Pa mas informacion por pasa na nos Centro di Informacion na Spinozastraat 9 of tuma contacto cu nos via nos FaceBookpage Koningin Wilhelima Fonds Aruba. Tambe por yama na 5820412.
Posted in: Uncategorized