Peso durante infancia

Peso durante infancia ta decisivo pa peso despues

Muchanan y hobennan cu ta subi di peso lihe ta core mas riesgo di tin sobrepeso ora di ta adulto. Esaki a wordo constata den un estudio cientifico nobo di Wereld Kanker Onderzoek Fonds, un fundacion na Amsterdam dedica na prevencion di cancer y cu ta coopera cu e kankerfonds local KWF-Aruba. Expertonan ta enfatisa cu prevencion di sobrepeso mester cuminsa for di un edad hopi trempan. Sobrepeso ta un di e factornan di riesgo mas importante pa haya cancer.

unnamed

Den e estudio nobo aki cientificonan a enfoca riba tres periodo di desaroyo importante: e prome añanan di bida (0-2 aña), infancia (3-8 aña) y pubertad (9-15 aña). Nan a sondea posibel relacion entre subimento di peso den e periodonan aki y e peso ora di ta adulto. E resultadonan ta mustra cu tin un relacion fuerte entre subimento di peso durante infancia y pubertad y e peso (y cantidad di vet) ora di ta adulto.

E estudio aki a tuma lugar door di analisa informacion di un projecto di investigacion cu a cuminsa na aña 1985. Den e projecto aki informacion tocante peso, alimentacion, y crecemento di muchanan cu a participa a wordo midi y registra desde nan prome lunanan di bida te cu ora nan a bira adulto. E projecto aki a tuma lugar na Alemania.

E resultadonan di e estudio ta mustra cu ta hopi importante pa siña muchanan y hobennan for di trempan caba pa tin un estilo di bida saludabel. Esaki ta encera come saludabel, move mas, y mantene un peso saludabel. Mas trempan muchanan siña un estilo di bida saludabel, mas miho. Esaki no ta importante pa nan salud ora di ta mucha so, pero tambe pa nan salud mas laat ora cu nan ta adulto.

Mayornan tin un deber hopi importante pa siña nan yiunan for di chikito caba pa come saludabel y haci actividad fisico. Consehonan ta pa limita cuminda cu hopi caloria manera fastfood, bebida cu hopi sucu manera refresco, y mucho sintamento. Un patrono di alimentacion cu hopi berdura, fruta y grano integral ta saludabel. Tambe ta importante pa muchanan move mas, por lo menos 1 ora pa dia tur dia.

A Boy Comparing An Apple And A Cookie

Fundacion Wereld Kanker Onderzoek Fonds ta enfatisa e importancia di un peso saludabel. Esaki ta hopi importante pa den futuro reduci e riesgo di haya cancer.  Sobrepeso tin relacion cu diferente sorto di cancer: cancer di tripa, esofago, pancreas, riñon, matriz, ovario, pecho (cerca hende muhe despues di menopausa), y galblaas.

Germund Daal, vocero di Wereld Kanker Onderzoek Fonds: “Awendia hopi hende na Aruba tin problema cu peso, y esaki ta trece hopi riesgo pa problema di salud cu ne. Mas trempan muchanan siña pa tin un estilo di bida saludabel, mas miho. Door di preveni sobrepeso awe, nos por preveni hopi casonan di cancer y otro malesanan mañan.”

Wereld Kanker Onderzoek Fonds, estableci desde 1994 na Amsterdam, Hulanda, ta sondea continuamente e relacion entre cuminda, nutricion, actividad fisico, peso y e riesgo di haya cancer. A base di analisis di miles di estudio, y den cooperacion cu expertonan di rond mundo, Wereld Kanker Onderzoek Fonds a formula 10 recomendacionnan pa yuda reduci e riesgo di haya cancer. Wereld Kanker Onderzoek Fonds ta colabora cu diferente otro fundacion rond mundo cu ta combati cancer, tambe cu KWF-Aruba, e fundacion nacional di cancer na Aruba. Pa mas informacion por yama Koningin Wilhelmina Fonds Aruba na 5820412 of wak nos Facebook Koningin Wilhelmina Fonds Aruba.

Posted in: Uncategorized