Prevencion di cancer di e boca di matris

Cancer di boca di matris
Ora di cancer ta papia di division di cel. Sinembargo den e caso aki e division di cel no ta pa reemplasa cel, ni pa crecemento normal di e curpa. Aki ta trata di un division sin necesidad y for di control. E celnan aki tin defecto y no ta funciona debidamente. Den caso di cancer di boca di matris, esaki ta encera cu e celnan di e cuero fini di e boca di matris ta cuminsa crece sin control. Resultado di esaki ta cu e celnan no ta keda solamente na e cuero, pero ta bai penetra den e structura bao di e cuero. E celnan aki ta destrui e structuranan cu e ta haya riba su caminda. Riba su caminda e ta topa cu e blaas i e tripa. E ta traha manera un buraco den nan dor di forma gruponan di celnan maligno. Tambe e por cera e canal cu ta trece e orina na e blaas. Esaki por causa daño severo na e riñonnan. Cancer tambe ta afecta e adernan cu e ta haya riba su caminda causando sangramento pisa. Na final tur e dañonan aki ta resulta fatal pa e persona.

Anatomia
E matris cu por wordo mira den figura 1 tin un largura di 9 cm. E ta situa den barica di hende muher. Na ambos banda di e matris tin un ovario y trompa. E ovarionanan ta produci e webo/eicel y diferente hormonas. E trompanan ta guia e webo/eicel na e holter di e matris. E matris ta habri den e vagina of curpa. E parti di e matris cu por wordo mira den e curpa ta jama boca di matris. Den e boca di matris tin un habri chiquito. For di e habri chiquito ta core un canal fini te na e holter di e matris. Mescos cu e cuero di e vagina, e cuero di e boca di matris ta consisti di varios nivel di celnan riba otro. E cuero di e canal fini menciona, tin solamente un nivel di cel. E dos tipo di cuero ta topa otro net na e habri chiquito di e boca di matris figura 2 number 12. Casi semper cancer ta cuminsa na e lugar unda e dos tipo di cueronan ta topa otro.

figure-1 fig-2

1.Trompa 2.Blaas di urina 3.Schaambeen 4.Vagina 5.Clitoris 6.Tubo di urina, 7.Vagina 8.Ovario 9.Tripa diki 10. Matris 11.Vagina 12.Boca di matris 13.Tripa 14.Anus.

E desaroyo di cancer
Desaroyo di cancer ta tuma varios aña. Un cuero normal no ta cambia diripiente den un cuero di cancer. E cuero mester pasa dor di cambio, jama dysplasia.  Tin diferente grado di dysplasia. Den figura 3 por mira e cuero normal cu diferente nivel di celnan. Dysplasia di e cuero semper ta cuminsa den e parti abow di e cuero. Si e dysplasia ta bira mas grave, e cambio di e celnan ta subi mas halto den e cuero. Si e dysplasia ta afecta henter e cuero, ta jama e situacion aki “carcinoma in situ”, lo cual ta encera un situacion hopi cerca di cancer. Si e dysplasia ta penetra den e structuranan bow di e cuero nos ta papia di cancer.

fig-3

Causa di cancer
Hende muher cu ta cuminsa trempan cu actividad seksual i tambe hende muher cu tin hopi partner seksual tin riesgo mas halto pa haya cancer na boca di matris. E motibo di esaki ta cu dor cu cerca un hoben e boca di matris no a madura suficiente. E ta mas vulnerable na infeccionnan. Den caso di hopi partner seksual e chens pa keda infecta cu un malesa transmit seksulamente tambe ta mas grandi. Den estudionan realisa durante añanan riba e causa di cancer na boca di matris, Human Papiloma Virus (HPV), e virus cu ta causa entre otro fretnan venerico, a keda detecta.Tin hopi tipo di HPV y ta prueba cu algun di e tiponan di HPV ta stimula i causa cancer na boca di matris. E hende homber por ta portador di e virus sin cu e ta causa daño na e curpa di e hende homber. Pa medio di relacion seksual e hende homber ta infecta e hende muher. Den caso cu e hende muher keda infecta e virus lo desaroya su mes y afecta e celnan di e cuero di e boca di matris causando e cambio of dysplasia cu por resulta na final den cancer.

Prevencion cu Pap-test
Manera menciona anteriormente dysplasia ta un proceso gradual i ta tuma varios aña pa desaroya. Ta posibel pa haci uso di e tempo ey pa detecta e dysplasia prome cu e resulta den cancer. Lastimamente dysplasia no ta causa sintomanan, sino por a detecte mas trempan. Ta e dokter George Papanicolaou a inventa e metodo conoci como pap-test. Ta haci uso di un skeiro fini cu ta pasa riba e cuero di e boca di matris y tambe den e habri chiquito caminda cu cancer mas tanto ta cuminsa desaroya. Celnan di e cuero ta pega den e skeiro. Ta pone e celnan obteni di e skeiro riba un pida glas special di laboratorio, caminda laboratorio lo haci un analisis di e celnan. E dokter cu a tuma e muestra di cel/haci e pap-test lo haya e resultado di test bek di laboratorio. E resultado ta bin den diferente clase.

Clase I: Normal. Esaki ta haya cerca un hende muher hoben.
Clase II: Normal. Por tin algun irritacion a base di un infeccion
leve. E gran mayoria di hende muher tin clase II.
Clase IIIa: Tin algun sospecho di celnan abnormal.
Clase IIIb: Tin mas sospecho di celnan abnormal.
Clase IV: Tin sospecho pisa. Probablemente tin
“carcinoma in situ”, lo cual ta hopi cerca di cancer.
Clase V: Casi sigur tin cancer di boca di matris caba.

Pashentnan cu clase IIIa of mas mester haya un evaluacion mas profundo di un specilista. No ta asina cu tur pashent cu tin un pap-test di IIIa automaticamente tin cancer. E pap-test ta solamente un metodo pa selecta cual di e pashentnan mester di un evaluacion mas specialisa i cual no tin mester di dje.

fig-4

Colposopia cu biopsia
Una bes e pashent bai un specialista, un evaluacion di e boca di matris lo tuma lugar cu yudansa di un aparato jama colposcoop. Esaki ta un tipo di microscoop cu ta duna e dokter e oportunidad pa wak e boca di matris mas detaya. Si e dokter ta wak un lugar na e boca di matris cu no ta mustra completamente normal e por tuma un biopsia di e cuero. Un biopsia ta un pida cuero/carni hopi chikito cu e dokter ta corta pa manda laboratorio pa analisis. Despues cu e dokter ricibi e resultado e por duna un diagnostico. E diagnostico por ta lo sigiuente:

1. Normal;

2. Dysplasia cu diferente nivel;

3. Carcinoma in situ (hopi cerca di cancer) of

4. Cancer.

Siguramente no ta tur pashent cu a haci un biopsia tin dysplasia of cancer. Algun pashent tin un biopsia completamente normal.

Tratamento
Tratamento di dysplasia ta depende di e grado di dysplasia i tambe e lugar na unda e dokter ta wak e cambio riba e boca di matris. Tratamento ta encera destrui of elimina e cuero cu ta malo. Tin e sigiuente tipo di tratamentonan disponibel:

  • Cryoterapia: cu e metodo aki ta vries e cuero di e boca di  matris afecta resultando den desrtuccion di e celnan di e cuero.
  • Leep-excision: cu e metodo aki ta kita (schaaf) un pida fini di e boca di matris.
  • Conisacion: cu e metodo aki ta haci un operacion chikito pa kita un pida di e boca di matris pa evaluacion/analisis mas intensivo.

fig-5                fig-6

Si acaso un pashent tin cancer avansa caba un operacion specifico of radioterapia lo ta e sigiuente opcionnan, dependiendo di e conseho di e dokter.

Conclusion
Ta tuma varios aña prome un hende muher desaroya cancer di boca di matris. Asina tin varios aña pa detecta e dysplasia prome cu e bira cancer. Pesey ta consehabel pa haci un pap-test tur aña, cerca un hende muher asina cu e ta seksualmente activo. Cu pap-test por selecta e pashent cu tin sospecho di dysplasia y manda pa un evaluacion di un gynecologo. Un causa importante di dysplasia i cancer di boca di matris ta HPV. Pa bo minimalisa e chens di  keda infecta cu e virus aki ta consehabel pa no cuminsa cu relacion seksual na un edad demasiado hoben (bow 18 aña), tampoco haya un yui bow di 16 aña, limita e cantidad di partner seksual of haci uso di e metodo “safe sex” dor di haci uso di un condon. Humamento tambe ta hisa e riesgo.

Pa cualkier pregunta riba e topico aki, por skirbi esaki riba un papel i pasa na bo dokter di cas, gynecologo of oficina di Koningin Wilhelmina Fonds pa mas informacion.

Reduci bo posibilidad di haya cancer. Busca informacion y trece cambio den bo    estilo di biba pa bo por preveni cancer. Bo salud ta den bo man…pakico lag’e bai.

Posted in: Uncategorized