Tuma rienda! Den bo man esaki ta!

Nos ta sugeri 10 medida cu abo por tuma pa reduci e riesgo pa haya cancer. E medidanan aki tambe ta haci bo sinti miho di salud y en general. 

1. No huma ni kauw tabaco. Humamento tin riesgo grandi no solamente pa e humado, pero tambe pa esnan rond di dje. Si bo ta na estado y bo ta huma bo lo pasa e huma directo pa e baby y bo por core e riesgo di haya cancer. Combinacion di humamento y bebida alcoholico ta aumenta e riesgo di haya cancer.

2. Ta importante pa pone atencion na loke bo ta come. Pa un dia comun consumi minimalmente 5 porcion di alimento di origen vegetal manera batata wortel, brocoli , kool , promenton berde, apelsina, strawberry, peach, tomati y patia. Scoge alimentonan di grano integral manera pan, cereal (papa), aros, pasta, b0nchi, en bes di granonan y sucu procesa manera : bolo, cereal (papa) cu sucu, dessert/postre.

Kico ta un porcion? Un racion por ta:

  • ½ copi di fruta
  • ¾ copi di juice 100%
  • ½ copi di berdura cushina of sin cushina (curu/raw)
  • 1 copi di berdura of vegetal di blachi
  • 1 pida fruta mediano
  • 1 pida pan
  • 1 ons di cereal (papa) seco
  • ½ copi di cereal (papa) cushina, aros of pasta

3. Limita e contenido di vet den bo dieta. Scoge cuminda cu poco vet. Bebe lechi sin vet of cu poco vet. Come keshi cu tiki vet. Trata di consumi un tiki cantidad di manteca, margarina, alimentonan hasa y dessert/postra cu hopi caloria.

4. Limita carni cora den bo dieta, specialmente carni cu hopi vet y carni procesa. Scoge carni sin vet y galiña of calacuna sin cuero.

5. Si bo ta bebe alcohol , limita bo mes na un glas pa dia si bo ta hende muhe y dos glas pa dia si bo ta hende homber.

6. Haci ehercicio fisico manera cana, traha den bo hardin of baila por lo menos 30 minuut of mas durante cinco dia of mas den siman. Consulta cu bo dokter prome cu bo cuminsa un programa di ehercicio.

7. Proteha bo cuero contra rayonan ultravioleta. Expone bo mes na solo lo menos posibel entre 10 AM y 4 PM , ora e rayonan ultravioleta ta mas fuerte. Ora bo ta pafo y si bo ta expone bo mes na solo, cubri ful bo curpa cu paña. Bisti un sombre cu rand hancho cu ta proteha bo cara, orea y nek. Uza un locion di proteccion contra solo cu tin e factor (SPF) igual of mas halto cu 15 riba ful e curpa cu no ta cubri cu paña. Uza bril di solo cu ta proteha bo contra e rayonan ultravioleta. No uza lampinan solar ni tampoco by salon di beyesa cu ta uza aparatonan pa bo broncea (bira bruin).

8. Si bo ta traha cu substancianan kimico ‘malo’ of cu fibranan manera asbest, haci uzo di bistimento adecua cu ta proteha bo y observa tur e normanan di proteccion. Sigura bo mes cu bo a siña tur e procedimentonan di auxilio den caso di emergencia.

9. Pidi bo dokter pa samina bo regularmente y puntre’e tocante e guianan di detecta cancer trempan cu KWF (FUndacion di Cancer/Koningin Wilhelmina Fonds) ta provee.

10. Pa mas informacion tocante cancer comunica cu KWF pa cualkier ora na tel : 5820412.

Tuma riendo y hiba un bida mas sano!

Speransa , Progreso, Contestanan.

KWF – Koningin Wilhelmina Fonds.

Posted in: Uncategorized